Terra n'fosa

Tanta storie m’aggia purtato appriesso
m’agghiuttevo ‘a malincunia
piglianno ‘a cavice ‘a verità!
Stu cielo che chiagne
assumiglia ‘a faccia mia ‘e st’ultime tiempe :
arraggiata ‘e lacrime
‘e dulore
- e penzieri ca nun m’apparteneveno cchiù -
comme quanne te siente astritto
e ‘a casa nun vuò turnà
pecchè si sulo!
Allora te ne staje sotto ‘o chiovere
penzanne ca tutta chest’ acqua
scenne pe t’accarezzà ‘a vita
l’anema
chello ca penzi e te turmenta
e staje llà
mmiezo ‘a via
tu, ‘e panne ca se spognano
‘a vita che è pavato
e ‘o riesto ca nisciuno maje te dà!
Che sacche chine ‘e sbaglie
me ne vaco fujenno
po Casale
pe tutta San Giuvanne
comme si ‘o mmale e tutte quante
s’arreversasse n’cuolle ‘a mme
me rignesse ‘o portafoglio
m’abbuffasse ‘e peccate
tutti chilli peccate
addò ij nun c’azzecco niente
e ca mò me porto dint ‘e sacche!
A vote pure si ‘e luce do munno
se stutasseno tutte quante
nun riesci a durmì
e ‘a notte te fotte
te fa paura
cchiù paura da morte!
Pecchè stasera
quanno schiove
nun te miette quacche cosa n’cuollo
e scinne cu me,
sbariamme pe mm’iezz ‘a via.
Cammenammo pe luce e sta città
e tutto ce pare cchiù belle,
pure chello ca schifamme!
Abbasce ‘o borgo marinaro
ce guardamme, ce tuccamme
comme si tutte cose fosse ‘o nuosto
e proprio llà
ogni suogne
ogni desiderio cchiù nascuso
se pò realizzà all’intrasatta.